Active

Higher & Further Education

Fri Jun 6 2025

Mon Jun 23 2025

Wed Aug 20 2025

Fixed-term

1

Poist Léachtora ar an Máistreacht Ghairmiúil san Oideachas (bunmhúinteoireacht), dhá phost ar iasaht

Agus é spreagtha ag fís na Críostaíochta, pobal teagaisc, foghlama agus taighde is ea IOM atá tiomanta d’ionchuimsiú agus do bharr feabhais san oideachas a chur chun cinn. Is coláiste cleamhnaithe de chuid Choláiste na Tríonóide, Baile Átha Cliath, Ollscoil Bhaile Átha Cliath é IOM, agus cuireann sé cláir fochéime agus iarchéime san oideachas ar fáil, lena n-áirítear cláir oideachais tosaigh múinteoireachta.

Cuireann Bord Rialaithe IOM cuireadh roimh iarratais ó mhúinteoirí ag a bhfuil cáilíochtaí oiriúnacha do na poist seo:

POIST LÉACHTORA AR AN MÁISTREACHT GHAIRMIÚIL SAN OIDEACHAS (BUNMHÚINTEOIREACHT) CONAIR LÁN-GHAEILGE
DHÁ PHOST AR IASACHT

Ag cur le rath chéim an Baitsiléara san Oideachas trí Mheán na Gaeilge in 2019, is cúis bhróid d’Institiúid Oideachais Marino a fhógairt gur seoladh den chéad uair riamh in Éirinn Máistreacht Ghairmiúil san Oideachas (MGO- Bunmhúinteoireacht) Conair lán-Ghaeilge. Tá an chonair seo dí-rithe ar chéimithe a bhfuil suim mhór acu sa Ghaeilge agus san oideachas lán-Ghaeilge. Tabharfaidh na mic léinn seo faoi mhodúil trí mheán na Gaeilge ina mbeidh béim ar an tumoideachas. Déanfaidh siad gach socrúchán scoile i scoil Ghaeltachta nó scoil lán-Ghaeilge.

Is mian le hInstitiúid Oideachais Marino (IOM) beirt Léachtóirí Cúnta / Léachtóirí san Oideachas Tosaigh Múinteoirí ar an Máistreacht Ghairmiúil sa Oideachas (Bunmhúinteoireacht) Conair lán-Ghaeilge a cheapadh ar bhonn iasachta.
Tá an dá ról seo faoi réir faofa ón Roinn Oideachais agus Óige.

CUR SÍOS GINEARÁLTA AR NA POIST
Dualgais agus Téarmaí & Coinníollacha Ginearálta Fostaíochta

1 PRÓIFÍL AN IARRTHÓRA AGUS RAON FEIDHME AN PHOIST
Beidh dualgais ghinearálta i réimse na Gaeilge agus an oideachais freisin ar an duine a cheapfar, mar shampla, seimineáir Ghaeilge, scrúduithe cainte, riarachán.

Is tábhachtach an tréith é an tiomantas don fhoghlaim agus teagasc d’ardchaighdeán i dtimpeallacht mac léinn-lárnach. Tá sé inmhianaithe díograis le haghaidh timpeallacht ildisciplíneach a bheith ag an iarrthóir. Caithfidh an duine a cheapfar fianaise a léiriú dá dtiomantas láidir do bharr feabhais sa teagasc, taighde agus sa ghníomhaíocht leanúnach scolártha.

Cáilíochtaí agus Scileanna Bunriachtanacha (i.e. scileanna nach féidir le hiarrthóir an post a dhéanamh gan iad. Ní dhéanfar iarratais a chur ar an ngearrliosta nár léirigh go soiléir go bhfuil na bunriachtanais ag an iarrthóir):

Ionas go measfar iad don phost seo, beidh an méid a leanas ag teastáil ó iarratasóirí:

a) Ní mór do gach iarrthóir post múinteoireachta aitheanta a bheith aige/aici i mbunscoil aitheanta NÓ a bheith ar iasacht ó phost aitheanta i mbunscoil aitheanta.
b) Cáilíocht iarchéime ábhartha san Oideachas / sa Ghaeilge ag leibhéal máistreachta agus is fearr ag leibhéal dochtúireachta
c) Líofacht sa Ghaeilge
d) Taithí iomchuí i réimse an oideachais / sa Ghaeilge le hinniúlacht léirithe chun cúrsaí d’ardchaighdeán a chur ar fáil ag leibhéal na fochéime agus leibhéal na hiarchéime.
e) Fianaise ar rannpháirtíocht i dtaighde/ i gcleachtas nuálach i ngort an Oideachais / na Gaeilge, go háirithe i réimse an bhunoideachais nó an oideachais dara leibhéal.
f) Eolas ar fhorbairtí comhaimseartha i réimse leathan an oideachais, agus go háirithe sa tumoideachas.
g) Cumas san oideachas ar líne, amhail ríomhphunanna chomh maith le bealaí foghlama cumaisc, ciana agus solúbtha.

Ní mór d’iarrthóirí a léiriú go soiléir ina n-iarratais an dóigh a gcomhlíonann siad gach ceann de na réamhriachtanais seo.

2. CUR SÍOS AR NA POIST
An Caidreamh Tuairiscithe

Éilítear ar an té a cheapfar na dualgais a bhaineann leis an bpost a chur i gcrích, faoi stiúradh ginearálta Cheann Roinn na Gaeilge dá dtuairiscíonn sé / sí, agus dá bhfuil sé / sí freagrach as feidhmiú na ndualgas sin ar an gcéad dul síos. Tuairisceoidh an duine a cheapfar trí Cheann Roinn na Gaeilge chuig Uachtarán na hInstitiúide agus / nó chuig cibé oifigigh IOM eile a d’fhéadfadh an tUachtarán a ainmniú ó am go ham.

D’fhéadfadh an caidreamh tuairiscithe bheith faoi réir ag athbhreithniú tréimhsiúil, ar aon dul le riachtanais seirbhíse agus le forbairtí san Institiúid.

Dualgais agus Freagrachtaí

Áirítear na nithe seo a leanas leis na dualgais:

• Dearadh clár / modúl, léachtóireacht, obair ar ranganna teagaisc, agus measúnú i réimse an oideachais / na Gaeilge ar an Máistreacht Ghairmiúil san Oideachas (Bunmhúinteoireacht) – Conair lán-Ghaeilge, lena n-áirítear Múineadh na Gaeilge, Staidéir Ghairmiúla, Garchleachtas, na Bonnstaidéir (Stair an Oideachais, Fealsúnacht an Oideachais, Síceolaíocht an Oideachais, Curaclam agus Measúnú), modheolaíocht ábhair ag leibhéal na bunscoile, Modhanna Taighde, Luathoideachas.
• Forbairt straitéisí nuálacha teagaisc agus foghlama.
• Tiomantas a léiriú do chlár oibre taighde a leanúint agus taighde a fhoilsiú i réimse an oideachais / i léann na Gaeilge.
• Forbairt ríomhphunanna le mic léinn thar chontanam an oideachais
• Maoirseacht a dhéanamh ar mhic léinn atá rannpháirteach i dtaighde fochéime agus iarchéime
• Riarachán a dhéanamh trí mheán na Gaeilge.
• Páirt a ghlacadh sna dualgais / próisis riaracháin ar fad den roinn lena n-áirítear rannpháirtíocht i gcruinnithe na roinne, cruinnithe na hInstitiúide agus cruinnithe de chuid grúpaí eile.
• Bheith i láthair agus páirteach i ngach cruinniú de chuid Chúirt na Scrúdaitheoirí.
• Comhaltas de choistí na hInstitiúide agus na dualgais is iomchuí do na coistí sin a chomhlíonadh.
• Comhairliúchán leis na mic léinn agus leis an bpobal foghlama níos leithne.
• Páirt a ghlacadh i ngnáthaimh roghnúcháin le haghaidh mic léinn ionchasacha ar nós agallaimh don MGO / agallaimh mac léinn lánfhásta.
• Cur leis na himeachtaí ar fhéilire na hInstitiúide ar nós an Lá TEG, Lá Oscailte, an tseachtain ionduchtaithe, feitheoireacht scrúduithe.
• Cur le dearadh modúl agus cúrsaí nua, nuair is cuí.
• Feidhmiú mar theagascóir pearsanta le mic léinn agus é leithdháilte.
• Seacht dtreoirphrionsabal na n-iontaobhaithe a chur chun cinn.

Ba cheart a thabhairt faoi deara nach mór don cheapaí obair a dhéanamh mar bhall foirne i ngach réimse oibre / roinn laistigh den Institiúid. Cé go bhfuil na dualgais a bhaineann leis an bpost sainithe ar an iomlán faoi na ceannteidil éagsúla mar atá liostaithe, ní liosta uileghabhálach é liosta na ndualgas. Éileofar ar an gceapaí feidhmiú ar bhealach solúbtha agus comhghleacúil. Forchoimeádann IOM an ceart dualgais nua a shannadh nó foireann a athshannadh do réimsí eile na hInstitiúide, nó an dá rud araon, mar fhreagairt ar riachtanais seirbhíse.

3. EOLAS MAIDIR LE hIARRATAIS, MAIDIR LEIS AN bPRÓISEAS ROGHNÚCHÁIN AGUS EOLAS GINEARÁLTA EILE.

Modh Roghnúcháin le haghaidh Molta

Déanfar gearrliostú iarratasóirí a bheidh bunaithe ar cháilíochtaí, ar oiriúnacht agus ar thaithí oibre ábhartha an iarratasóra de réir mar atá sonraithe san iarratas. Is é an t-iarratasóir atá freagrach as a chinntiú go gcuirtear faisnéis ábhartha uile san áireamh lena iarratas / hiarratas agus go dtaispeánann sé / sí go soiléir conas a chomhlíonann sé / sí na critéir iarrthóra shonraithe.

Déanfaidh painéal agallaimh an t-agallamh. Beidh an painéal comhdhéanta de líon nach lú ná 3 duine, agus cuimseofar na daoine is oiriúnaí agus is cáilithí leis chun iarratasóirí sa disciplín a mheasúnú. Is é an Bord Rialaithe a dhéanann gach ceapachán fostaíochta ag IOM. Cuirfear moltaí an phainéil agallaimh maidir le hiarratasóirí rathúla a cheapadh do phoist uile faoi bhráid Bhord Rialaithe IOM lena bhreithniú agus lena chinneadh.
Sa chás nach molann an painéal agallaimh ceapadh buan, forchoimeádann an Institiúid an ceart chun iarrthóir oiriúnach a cheapadh, aitheanta tríd an bpróiseas roghnúcháin, don phost ar bonn téarma seasta.
D’fhéadfaí painéal a chruthú óna bhféadfaí ceapacháin ar chonarthaí buana nó téarma seasta a líonadh le linn shaolré an phainéil. Cuirfear deireadh leis an bpainéal 12 mhí tar éis a dháta foirmithe, is é sin dáta an agallaimh thosaigh.

Ní mór d’iarrthóirí fianaise dhoiciméadach shásúil a chur ar fáil ar oiliúint agus ar thaithí uile arna maíomh acu, más gá.
Tréimhse Phromhaidh

Braitheann an ceapachán ar thréimhse phromhaidh 4 mhí ar fhad a chur i gcrích go sásúil. D’fhéadfaí an tréimhse phromhaidh a shíneadh faoi rogha na hInstitiúide ach in aon chás ní mhairfidh sí níos mó ná 6 mhí. Sínfear an tréimhse phromhaidh mar gheall ar neamhláithreachtaí lena linn. Déanfar monatóireacht ar fheidhmíocht agus ar iompar le linn na tréimhse promhaidh trí phróiseas de chruinnithe measúnaithe. Beidh foirceannadh fostaíochta le linn na tréimhse promhaidh faoi rogha na hInstitiúide. Beidh leagan ciorraithe den nós imeachta smachta infheidhme maidir le fostaithe ar promhadh.

Grinnfhiosrúchán an Gharda Síochána

D’fhéadfadh sé a bheith riachtanach d’iarratasóirí rathúla uile páirt a ghlacadh i nGrinnfhiosrúchán an Gharda Síochána. Tabharfar treoir shainiúil maidir leis an bpróiseas sin ag an am iomchuí. Déanfar iarratasóirí nach gcomhlíonann riachtanais na hInstitiúide maidir leis sin a eisiamh ó bhreithniú don cheapachán seo.

Oiliúint Bhunriachtanach
Beidh ar an iarratasóir a éiríonn leis nó léi san agallamh, tabhairt faoin oiliúint chomhlíontachta bhunriachtanach seo a leanas: Ionduchtú, Sláinte & Sábháilteacht agus Cosaint Sonraí (RGCS), agus ní mór dó / di fianaise a sholáthar ar Oiliúint maidir le Cosaint Leanaí de chuid Tusla a bheith déanta acu. Seans go mbeadh gá le tabhairt faoi oiliúint eile má tá gá leis sin.


Na hIarratais a Dhéanamh

Déan iarratas le litir chlúdaigh agus CV amháin (ní chuirtear aon fhoirm iarratais speisialta ar fáil), tríd an ríomhphost más féidir chuig careers@mie.ie nó tríd an bpost chuig:

An Oifig Acmhainní Daonna
Institiúid Oideachais Marino
Ascaill Uí Ghríofa
Baile Átha Cliath 9 (D09 R232)

Ní mór iarratais chomhlánaithe a bheith faighte faoi 23 Meitheamh ar 4.00 i.n. Ní ghlacfar le hiarratais i ndiaidh na sprice sin.

Ní bheidh an Institiúid freagrach as costais ar bith, lena n-áirítear speansais taistil, a bhféadfadh iarrthóirí iad a thabhú i ndáil lena n-iarrthóireacht.

Is fostóir comhdheiseanna í Institiúid Oideachais Marino.